உறைந்து கிடக்கும் அன்பு

பரணில் ஏறியவுடன்
கையில்பட்டது அப்பத்தாவின்
வெண்கலக் கும்பா
அதையொட்டி அழுக்கை
அப்பிக்கொண்டு கிடந்தது
தாத்தாவின் திருகுச்  சொம்பு

திருகுச் சொம்புடன்
திருகிக் கிடந்தது
அம்மாச்சி ஆசையாய்   கொடுத்த கெண்டி
தூக்க முடியாத கணத்தில்
முப்பாட்டியின் செம்பு அண்டா
பெரிய அத்தையின்
பெயர் பதித்த தவளைப் பானை
அம்மாவுக்குத் தாய்மாமன்
சீராய்க் கிடைத்த செப்புக் குடம்
நகர்த்தவே முடியாத
இட்லி சட்டி

ஒன்றின் மேல் ஒன்றாய்க் கிடந்த
அந்தப் பாத்திரங்களுக்குள்
தூசியும் அழுக்கும் அடைந்து கிடப்பதாய்
சொன்னது அக்கா
எங்கள் மீதான
மூதாதையர்களின் அன்பு
அதற்குள் ஆண்டாண்டுகளாய்
உறைந்துகிடப்பதாய் சொன்னேன்

ஆமாம் என்றது
 என்னுடன் சேர்ந்து
பள்ளியும் கரப்பானும்