கனவுகளை இழந்தபிறகு கண்கள் கூட எதற்கு?!

என் கனவுகளை அம்மாவுக்காக விற்றேன்
கொஞ்சம் அப்பாவுக்காக இழந்தேன்
அண்ணனுக்காகவும் அக்காவுக்காகவும்
சமரசம் இன்றி கொஞ்சம் விற்றேன்
திருமணம் ஆனது
மாமியாருக்காக நிறைய கனவுகளை
நின்ற இடங்களில் எல்லாம்
தெரிந்தே இழந்தேன்
மாமனாருக்காகவும்
பல கனவுகளை எங்கோ தொலைத்தேன்
கணவர் கேட்டார் என அத்தனை கனவுகளையும்
மொத்தமாய் தொலைத்தேன்
கண்கள் சொல்லிவிட்டன
இனி கனவு காண்பதற்கு
எனக்கு உரிமை இல்லை என்று!
அட,
கனவுகளை இழந்தபிறகு கண்கள் கூட எதற்கு?!